જૂનાગઢ મહાશિવરાત્રીના મેળાને લઈને આવ્યા મોટા સમાચાર...

ગુજરાતના જૂનાગઢ જિલ્લાનો પ્રખ્યાત મહાશિવરાત્રી મેળો આ વર્ષે કોવિડ -19 રોગચાળાને ધ્યાનમાં રાખીને યોજાશે નહીં. જો કે, મર્યાદિત સંખ્યામાં સાધુઓની હાજરીમાં પરંપરાગત ધાર્મિક વિધિ કરવામાં આવશે અને તેનું જીવંત પ્રસારણ કરવામાં આવશે.

આ પાંચ દિવસીય મેળાનું મહાશિવરાત્રીના દિવસે સમાપન થાય છે, જે આ વર્ષે 11 માર્ચે આવે છે. જૂનાગઢ શહેર નજીક ગિરનાર પર્વતની તળેટીમાં જિલ્લા વહીવટીતંત્ર અને ગિરનાર સાધુ મંડળ દ્વારા દર વર્ષે તેનું આયોજન કરવામાં આવે છે.

દર વર્ષે સેંકડો સાધુઓ પર્વતની તળેટીમાં એકઠા થાય છે. અહીં ભગવાન શિવના ઘણા મંદિરો છે. શહેરની નજીક યોજાતા આ મેળામાં દર વર્ષે દેશભરમાંથી આશરે 10 થી 12 લાખ લોકો એકઠા થાય છે.

આ વર્ષે, ધાર્મિક મેળાવડો 7 માર્ચથી શરૂ થવાનો હતો અને 11 માર્ચે સમાપ્ત થવાનો હતો. પણ કોરોના વાયરસને ફેલાવાતા રોકવા માટે સાધુઓ અને જિલ્લા અધિકારીઓએ સર્વસંમતિથી આ વર્ષે મેળાનું આયોજન ન કરવાનો નિર્ણય લીધો છે.

ગિરનાર સાધુ મંડળના ઇન્દ્રભારતી મહારાજે કહ્યું કે, જિલ્લા મેજિસ્ટ્રેટ સાથે મળેલી બેઠકમાં સર્વસંમતિથી નિર્ણય લેવામાં આવ્યો હતો કે કોરોના વાયરસના કારણે મેળાનું આયોજન કરવામાં આવશે નહીં. આપણે બધાએ વાયરસને ફેલાવાતા રોકવા માટે સરકાર દ્વારા નક્કી કરેલી માર્ગદર્શિકાનું પાલન કરવાની જરૂર છે. તમામ ભક્તોને વિનંતી છે કે જૂનાગઢની મુલાકાતે ન આવે કારણ કે આ વખતે મેળો ભરાશે નહીં.