વિજય માલ્યા, મેહુલ ચોક્સી અને નીરવ મોદીને પરત લાવવામાં આવી રહ્યા છે, તેમને કાયદાકીય કાર્યવાહીનો કરવો પડશે સામનો…

નાણાં પ્રધાન નિર્મલા સીતારમાએ ગુરુવારે કહ્યું હતું કે ભાગેલા ઉદ્યોગપતિ વિજય માલ્યા, નીરવ મોદી અને મેહુલ ચોક્સીને ભારત પાછા લાવવામાં આવી રહ્યા છે અને તેમને અહીં કાનૂની કાર્યવાહીનો સામનો કરવો પડશે. મોદી સરકાર બ્રિટનથી વિજય માલ્યા અને નીરવ મોદીના પ્રત્યાર્પણની કાર્યવાહી કરી રહી છે, જ્યારે ચોક્સી એન્ટિગુઆમાં હોવાના અહેવાલ છે.

વીમા સુધારણા બિલની ચર્ચા કરતી વખતે રાજ્યસભામાં નિર્મલા સીતારામણે કહ્યું હતું કે કાનૂની કાર્યવાહીનો સામનો કરવા વિજય માલ્યા , નીરવ મોદી, મેહુલ ચોક્સી બધાને દેશમાં પાછા લાવવામાં આવી રહ્યા છે. બંધ કિંગફિશર એરલાઇન્સ દ્વારા 9,000 કરોડ રૂપિયાના બેંક લોનના ડિફોલ્ટ કેસમાં મુખ્ય આરોપી માલ્યા 2016 થી લંડનમાં રહે છે.

નીરવ મોદી અને તેના મામા મેહુલ ચોક્સી જાહેર ક્ષેત્રની પંજાબ નેશનલ બેંક સાથે છેતરપિંડી કર્યા બાદ દેશ છોડીને ભાગી ગયા હતા. નીરવ મોદી અને મેહુલ ચોક્સી પંજાબ નેશનલ બેંકમાં રૂપિયા 14,500 કરોડના ફ્રોડ કેસમાં મુખ્ય આરોપી છે.

નાણાં પ્રધાને કહ્યું હતું કે વીમા ક્ષેત્રમાં વિદેશી રોકાણોની મર્યાદા વધારીને 74 ટકા કરવાથી વીમા કંપનીઓને તેમની વધતી મૂડીની આવશ્યકતા પૂરી કરવામાં મદદ મળશે. તેમણે કહ્યું કે, વીમા ક્ષેત્રમાં સીધા વિદેશી રોકાણોની મર્યાદા હાલના 49 ટકાથી વધારીને 74 ટકા કરવાનો નિર્ણય સેક્ટર રેગ્યુલેટર સાથે ચર્ચા કર્યા પછી જ લેવામાં આવ્યો છે.

તેમણે કહ્યું કે 2015 માં વીમા ક્ષેત્રની એફડીઆઈ મર્યાદા 49 ટકા કરી દેવામાં આવી ત્યારથી આ ક્ષેત્રમાં અત્યાર સુધીમાં 26,000 કરોડ રૂપિયાનું રોકાણ કરવામાં આવ્યું છે. મંત્રીએ કહ્યું કે વીમા કંપનીઓ દબાણનો સામનો કરી રહી છે, તેથી તેમને મદદ કરવા માટે એફડીઆઈ દ્વારા મર્યાદામાં વધારો કરવાનો નિર્ણય લેવામાં આવ્યો છે.